由王祖藍執導，曾志偉、樂易玲監製，改編自百老匯音樂劇嘅歌舞賀歲電影《你咪理，我愛你！》，今日喺灣仔演藝學院進行拍攝，出席演員包括王祖藍、毛舜筠、曾志偉、王菀之、楊詩敏(蝦頭)、余香凝及陳小寶(細細粒)等。

首次擔任導演嘅王祖藍表示，高興能完成多年夢想，佢話今次部戲籌備10年，齣戲會有10多個單元故事，動用超過60名演員，當中包括鮑起靜、余安安、鄭秀文、容祖兒、謝君豪、詹瑞文、郭晉安等。祖藍表示，每個都係歌舞單元，毛舜筠會演6個角色，多個單元，其次是王菀之。對於今次是大投資還是碌人情咭，祖藍話：「會俾番公平嘅價錢，尊重每個演員。今次每個單元長數分鐘，全部都係歌舞，全部演員都好落力，鮑姐請埋老師幫自己排練，之後先嚟拍。」

祖藍表示，女兒將於新年前後出世，佢話：「到時邊剪片邊剪臍帶，正考慮緊開唔開刀，如果到時穿羊水，自己又忙緊就麻煩。」

毛姐毛舜筠話：「今日係最細波出現，得32 、33b，我喺戲中有6個角色，其中一個造型會有50F cup，大家可能都唔認得我，嗰個造型仲要跳舞，相當之攰，條腰都斷。拍攝大胸角色嘅時候，經常唔小心撞到余安安，唔知原來咁易撞到。」

精選娛聞，喺晒《娛果》
http://fb.com/appledailyent