雷神決定轉戰東瀛，消息的確令人震驚，但仍相信他今季要全力衛冕，務求有個完美結局。

早前也提過，雷神接受訪問時竟然呻練馬師多數撐潘頓，結果惹來後者在社交媒體來個「口水戰」，叫大家不要信「神」！

睇睇周日（10日）排位表，雖則雷神要到下個禮拜三（13日）才復出，但你可知道今勻有多少匹雷神新勝馬出賽？答案是零！

其實早前雷神停賽，也不只一次見他的大部份私伙馬同一時間掛免戰牌，兼且周日夾埋勝後再出馬不過得三隻。

換言之，就算今期潘頓獨攬大局，也不見得有大多實力超群之選，究竟練馬師對雷神作出的「協調」，不過純屬偶然定或另有原因，大家可以諗諗。

難得一次全日弱鬥弱，那些季內拼來拼去不出頭之輩，應要時間把握這大好機會打破悶局。

第九場三班田草1200米，全場並無一駒上仗跑入三甲，就算最具星味的「艮志騰雲」上仗亦告熱倒，證明本身並非無堅不摧。

同場「馬功臣」季初七字頭評分仍能在三班強組入圍，現時評64分有利可圖，近兩仗跑谷草1200米因排檔欠佳局留得太後，縱使交出22秒多快拉士仍姍姍來遲。

周日「馬功臣」喜逢弱旅兼抽回4檔好位，並重返較利追趕的田草長直路，應為開齋黃金機會，值得優先考慮。

另外，第十場四班1400米，蘇保羅馬房「友誼之星」季內未勝，但接連在三班強組末段有追，所以上仗落班用潘頓備受熱捧，可惜塞足大半條直路，只用得七成力，但仍輸得近。

今次對手較上仗更弱，「友誼之星」應可趁機補中，兼為馬主打開今季勝利之門。