陳展鵬最近真係是非纏身，啱啱至被業主投訴毀約兼欠租，最近又傳同袁文傑不和。有周刊報道指，陳展鵬同袁文傑積怨16年，大家雖然都係亞視出身，但私下無交情，早排幫大台拍《天命》，陳展鵬仲藐爆袁文傑。新聞一出，套劇就出街，真係夾都無咁啱。

噚晚陳展鵬、譚俊彥、唐詩詠、李施嬅、姚子羚等一班《天命》演員，約埋喺鑽石山同市民一齊睇首播，又咁啱真係唔見袁文傑出席，展鵬講到不和事件，佢就解釋袁文傑係因為有事所以缺席，唔係因為大家唔妥，佢仲笑笑口話：「都係時候，我咁沉悶，係要有啲新聞畀啲宣傳我，等我回應吓有啲嘢講，我同傑仔盡在不言中，下個差唔多到你（譚俊彥），同男人不和好過同女人。」

唐詩詠劇中飾演展鵬紅顏知己，佢話比起做夫人角色，更鍾意做紅顏知己。講到劇集播出撞正世界盃，對收視或有一定影響，但詩詠就話陳展鵬同佢講唔撞期：「所以話男人都係呃女人。我對收視都有信心。」

精選娛聞，喺晒《娛果》
http://fb.com/appledailyent