今晚電影《有客到》喺奧海城進行謝票活動，導演吳家麗帶同演員郭偉亮(EricKwok)、劉心悠、謝婷婷等到場。

Eric話老婆葉佩雯(Grace)喺首映已經同佢睇咗部戲，睇戲時自己好緊張，反而老婆就完全唔緊張，仲拖實佢隻手係咁哈哈笑，Eric話:「佢用演員角度睇我演出，睇到我係佢老公，咁多種原因，令佢一路睇一路笑，我話『你睇還睇，唔好笑』，不過好多謝佢，佢平時好少睇鬼片，因為我佢先睇。」

片中EricKwok扮變態豬肉佬，仲有姦屍兼露股戲份，記者問佢老婆Grace有冇叫佢著豬肉佬衫，Eric笑言:「佢話有靚豬肉搵我斬，我哋喺屋企都好鐘意煎豬扒。」佢仲話蘇永康睇完套戲仲send訊息俾佢讚佢籮柚靚，Eric笑話:「其實係替身嚟，不過唔諗住話佢聽住，由佢掛住幾日先。」

有冇諗過唔用替身?Eric話:「都有諗，但經理人同Grace話遲啲先，可能想keep耐啲，可能Grace想私有化我個籮柚，唔想咁快公開住，但都多謝蘇永康支持。」至於老友霆鋒噚日生日，佢話喺四哥掌摑曾江事件之前已經食過飯慶祝。

之前《有客到》首映四哥特登去支持阿女婷婷，Eric當日都喺度，問佢當日見到四哥有冇關心佢同曾江嘅事，Eric笑話四哥當時都話:「唔好提呢個人。」Eric話:「當日都估唔到四哥會嚟首映支持婷婷，四哥話婷婷演得好好，我就同四哥拉姑講打過佢哋個女，拉姑同我講話:『打得好丫，唔緊要丫，我平時都冇機會打。』佢哋一家人都好玩得。」