滙漢（214）平日成交靜到甩肺，但對上兩個交易日，成交額貼近1千萬銀，昅昅無妨。買滙漢，冇得傾，一定係買集團勁大嘅NAV折讓。滙漢連酒店資產值浮面，NAV上到近4.6元，現價（1.62元）折讓近65%，已經好吸引。又滙漢透過泛海（129）揸住油柑頭、香港仔呢批極有潛質嘅住宅項目，連埋大道中泛海大廈、灣仔滙漢大廈投資物業，呢期升值肯定唔嘢少。連物業重秤，滙漢NAV可以上到6蚊，NAV折讓係講緊73%，以NAV三折買滙漢，抵買。
再講，滙漢揸住淨現金上4億銀，每股淨現金高達0.8元，幾乎係現價一半水位。滙漢銀彈咁多，又靜局咗咁耐，有冇新搞作，係聯想所在。以滙漢NAV折讓60%計，滙漢要見2.4元，講緊要升48%，以滙漢NAV折讓50%計，要見3蚊，即係現價要升85%。

亞洲金融揸住咪放

10月尾建議昅實亞洲金融（662），喺4.1元兜底，上星期hit到買入價，揸住咪放。亞洲金融對上星期五，逆千點跌市上升，盡演避風股角色。此無他，亞洲金融07年半年度（6月底止），持續經營溢利大升180%，講業績，靚仔。又集團手頭淨現金高達15億銀，派息又慷慨，全年預測息率上到4.6厘，講財政，講息率回報，一樣吸引。繼續上望亞洲金融5蚊樓上，先慢慢食糊未遲。
錢雋