當年今日

新登場:
酒樓逆市覓新機 來路海鮮吸引中產客

蘋果日報 2002/06/10 00:00


市道不景氣,飲食業首當其衝,大型酒樓食肆相繼結業,然而有人辭官歸故里,亦有人漏夜趕科場,這是商業社會必然定律。就像這間剛開業的海鮮酒家,前身經營平價火鍋,但老闆眼看以平作賣點在市場已無空間,便把心一橫,將酒樓重新裝修,轉型走高格調路線,以舒適環境及中價海鮮吸引一班中產客。老闆倫哥更雄心萬丈,除了銅鑼灣的分店即將開張,他還在物色一個二萬呎或以上的舖位,打算將其飲食王國擴充至九龍,看來他真的充滿信心,要在這個逆市殺出一條新路。

記者:黃婉冰 攝影:楊錦文
澳洲龍蝦刺身、頭爪泡飯兩食$10/両
來自澳洲的龍蝦少了兩隻巨型蝦拑,但就多了些肉,兼且肉質爽口,所以身價亦較高。最好的品嘗方法當然是做刺身,生食無興趣?另有芝士焗、上湯焗、椒鹽甚至起肉油炮龍蝦球都得,食完個身到頭爪,大廚會將所有隱藏在大蝦頭和爪內的肉統統起出,最特別又夠飽肚當然是首選泡飯,加入瑤柱、瘦肉粒、冬菜用上湯做泡飯,無嘥。
蟹子雪影綠林$78
雪影是指炒鮮奶,鮮奶與蛋白混合,炒起來才可達至香而滑效果,油的份量和火候最考大廚的功夫,否則會變燶或油淋淋。炒鮮奶亦另有乾坤,墊有冬瓜絲,大廚特別撒上脆卜卜的蟹子增強口感,旁邊伴以小棠菜、豆腐和竹笙,菜名頗具詩情畫意。
龍飛鳳舞$128
龍是指白灼生蝦,鳳當然是指雞,老闆將兩者合併來個套餐大平賣,蝦是肉質較爽又有蝦味的海蝦,來自大陸的黃油走地雞採用原隻隔水蒸的方法來烹調,令雞味無得走,雞肉可以更原汁原味,蒸過後留低的雞汁,大廚會用來淋在雞上,為證明雞隻是即劏未入過雪櫃,會連同雞腸、肝和腎等一齊上枱,畀你由內食到外,完完整整地去品嘗。
老闆倫哥:
「我哋係用走地雞,新鮮運到未經過雪藏,好新鮮,全部都原隻隔水蒸,雞味可以保留,用水浸會令雞味流失,散叫一隻要$160,𠵱家套餐連一斤白灼生蝦做特價都只係$128,好抵食,值得一試。」
法海佛蒲團$48
一睇菜名就知這是一道素菜,外層是炸過的腐皮,內裏是三菇六耳,三菇即北菇、草菇、蘑菇,而六耳是指沙耳、雲耳、木耳、雪耳、黃耳、榆耳。所有材料切粒加調味料炒香,用炸腐皮包到實一實,淋上蠔油芡汁,圍上髮菜,材料傳統,做法創新,適合素食愛好者。
菜膽砂鍋雞鮑翅$880(十二位用)
菜膽砂鍋雞鮑翅是另一抵食推介,條條粗過牙籤,可以用筷子品嘗的是頂級翅─頂青,翅身軟滑,身價拍得住天九翅,其矜貴程度可想而知。一鍋十二位用有二十両翅。用老雞、火腿、豬肉等先用十多個小時熬製上湯,配以原隻鮮雞、菜膽和翅,用火爐熱住上,食得夠晒豪氣。
菜片海皇蹄粒$68
這道菜是傳統生菜包的化身,材料由肉碎改成高級數的海鮮粒,鮮蝦粒、帶子粒、甘笋加爽口馬蹄粒,三樣材料一同落鑊炒香,大廚特意加入馬蹄粒,讓海鮮粒變得爽脆可口,綴以炸得脆卜卜的炸米粉,自己落手落腳生菜片包住食,用手品嘗夠晒滋味。
店名:海天亞洲漁港
電話:25206680
地址:灣仔駱克道72-86號熙華大廈2字樓全層
座位:600個
營業時間:上午7時至午夜12時
付款方法:現金及信用卡(Visa,Master)