再婚嘅95年亞姐亞軍黎淑賢，佢第二任老公係美容醫生許智政，佢哋婚後育有3歲多囝囝許溢，早前黎淑賢宣佈再陀B，預產期係下個月，已有8個多月身孕嘅佢，日前帶囝囝去中環做產前檢查。
黎淑賢陀B都打扮靚靚出街，着住V領綠色上衣配窄腳褲，腳踏流蘇平底短靴，囝囝就着紅色外套，兩母子紅綠裝鬼咁搶鏡。黎淑賢拖住囝囝去完產檢就去咗買麪包醫肚。然後佢哋又再去咗Gap血拼，黎淑賢專攻嬰兒用品同童裝，3歲幾嘅許溢見媽咪忙於幫肚中嘅細佬揀衫，佢又有樣學樣，主動走去貨架係咁揀，好鬼搞笑。腹大如籮嘅黎淑賢買完嘢就拖住囝囝去等司機揸架逾百萬積架座駕嚟接走。

隨時早產

馮仁昭噚日問黎淑賢陀B嘅近況，佢話：「醫生話BB個頭太低，隨時會早產，呢兩星期我要瞓床，唔准出街，老公仲將我嘅聖誕派對取消晒。」許溢都好期待細佬出世陪佢玩，為咗細佬健康出嚟，佢家做「管家婆」幫醫生手睇住媽咪唔准佢操勞。