近排對記者態度好好嘅陳冠希同女友洪文安喺台灣慶祝聖誕節,今朝一早仲貼咗同女友sweetsweet嘅咀咀相出嚟,之後又有一張同父母家姐一齊影嘅全家福。今次唔使高登神探出馬,我哋都敢講話兩張相係同一個地方影嘅,事關除咗EDC打扮一樣,就連背景窗簾同燈光角度都一樣架。既然係同一個場合,即係陳家全員到齊,咁多人在場,唔怪得Ann影咀嘴相嘅時候有啲怕醜咁啦。
至於EDC舊愛阿嬌嘅老友蔡卓妍(阿Sa)同陳偉霆(William)拍咗拖唔經唔覺都幾年喇,先幾日我哋仲發現雖然William唔喺香港,阿Sa都仍然自出自入對方屋企,直情係女主人啦。今日下晝男主人陳生就貼咗抱B相出嚟,仲作狀錫抱喺手上嘅初生BB,仲寫住「愛不釋手」添。既然咁鍾意,唔知有冇打算快快手同阿Sa結婚再生返個靚B比自己玩吓呢?