拜恩（Kobe Bryant）近日向不同球員發出挑戰，早前就已經嗌公鹿球星「字母哥」G安迪度安寶（Giannis Antetokounmpo）嘗試喺新季爭MVP；而呢位湖人名宿近日更加玩大佢，向NBA 30支球隊嘅球星下戰書！

拜恩向勒邦占士（LeBron James）嘅挑戰，相信都係一眾球迷嘅心聲，因為佢嗌「大帝」新球季要試下玩入樽賽！

對於自己嘅粉絲K艾榮（Kyrie Irving），拜恩似乎都好高要求，佢嗌呢位今夏轉投塞爾特人嘅控衞，新球季要領軍終結占士連續七年入總決賽嘅走勢！而拜恩就嗌馬刺主將尼納特（Kawhi Leonard）要成為「波神」米高佐敦（Michael Jordan）後，首位喺同一球季贏得MVP同最佳防守球員嘅人。

不過，拜恩挑機時，似乎都係本住食花生嘅心態，對勇士前鋒杜蘭特（Kevin Durant）嘅要求，竟然係希望佢好似前隊友韋斯卜克（Russell Westbrook）咁，場均錄得大三元；而且佢仲嗌「一眉」安東尼戴維斯（Anthony Davis）要試下向塘鵝要求交易自己。