經一輪格價之後，年初Johnny終於扑槌揀選了一間裝修公司，負責的設計師Nic稱，單位面積不大，但居住人數預計4個，設計上甚具挑戰性，「好彩單位樓底高，有近9呎。樓底多一呎差好遠，可以用地下同上面做空間轉移」。
裝修工程4月中旬開始，最初協訂三個月交樓，惟進度一波三折，最終要延至8月底方完成。9月1日入伙前一晚，本報為單位作全方位拍攝，對比裝修前後狀態。寢區方面，兩間睡房均轉用趟門並訂做地台床，樓梯亦有櫃桶貯物，毋須再側身進出睡房。其中一間睡房用衣櫃間牆，「呢間房個衣櫃我就最滿意，夠兩、三個人擺嘢」。

全屋木地板鏟起重鋪木紋磚，客飯廳安裝數組訂做的通頂大櫃及吊櫃，顏色統一米白色，整體觀感較昔日企理。浴室告別80年代風格，瓷磚、鏡櫃、浴屏一律換新，再加裝假天花及多功能浴室寶，衞生情況有改善。廚房曲尺形工作枱上方裝設大型吊櫃，煮食用具及調味料終有地方安置，外觀型格的三門雪櫃移往大門旁新做大櫃內，成為大廳的時尚亮點。
若果以10分為滿分，Johnny對裝修評分只介乎6至7分，「對裝修少少失望」。例如他認為有些陳列櫃的深度不似預期，擺放物品有難度。揭開睡床邊罅位木板，地磚收口唔齊，牆角似未完工亦無地腳線，裝修埋尾馬虎，而多處櫃桶路軌不順。扣分位還包括用料，例如地台床只用金屬鉸，無油壓，收納取物每次都要全塊板往上揭，開合床板不便。客飯廳有一組櫃設揭板式餐枱，惟開合設計同樣有待改進，而且餐枱面積細，全家數人難一同用膳。