食物及衞生局同雞農、雞販就殺雞賠償談判瀕臨破裂，中環隨時出現群雞亂舞場面，政府今次企硬，誓要殺盡全港活雞，有政壇人士挑通眼眉，指政府表面上係想一勞永逸趕絕禽流感，實際上卻係借雞殺人，一石二鳥玩殘民建聯、自由黨之計。
政府推出所謂「終極方案」，要雞又要牌，一旦成事，雞農、雞販通通唔使做要轉行，原來仲牽連到民建聯漁農界議員黃容根政治命運。政界人士指出，雞農係黃容根選民，如果全部雞農交回牌照，漁農界選民人數驟跌，加上幾年前政府陸續收回豬場牌照，豬農數目買少見少，蠟燭兩頭燒，漁農界呢個功能組別存廢，真係好值得商榷。

取消漁農界一定引起好大爭議，同飲食界合併得唔得呢？既然兩個界別都係同食物有關，合二為一成為漁農飲食界聽落合情合理。對於呢個陰謀論，八方姑妄聽之，但一旦成事，自由黨飲食界議員張宇人首當其衝，隨時要同黃容根硬撼。
姑勿論上述陰謀論是否成立，但卻解釋到點解雞販唔係飲食界選民，張宇人都好上心幫佢哋奔走，正所謂一為神功，二為弟子，漁農界好，即係飲食界好，兩個界別四年後唔使合併，黃容根同張宇人亦毋須硬碰，否則兩個只能活一個。
點解政府要借雞殺人？煲呔同自由黨關係好成點，政界眾所周知，近日有小道消息傳出，雙方又有齟齬，促使煲呔動殺機。八方聽聞有自由黨人日前直踩禮賓府同煲呔講數，要求政府加碼賠償雞販，禮賓府方面認為有人獅子開大口，大嗱嗱幾十億，就算煲呔捨得，市民都唔肯過佢，萬一輿論狂抦民意狠批，真係賠了金錢又折兵。
由於自由黨唔係第一次「上山」搵煲呔講數，據講有人深感長此下去唔係辦法，繼續姑息後患無窮，所以決定擺出強硬姿態對待雞農、雞販；民建聯方面，雖則聲稱係「執政聯盟」，但始終猜忌煲呔，喺任命副局長、政治助理過程中，雙方就差啲講唔掂數幾乎反枱，港府既要撲殺禽流感病毒，又要清理政治無名腫毒，「終極方案」唔落重藥點得。

mailto:[email protected]