財政司司長陳茂波前日公佈嘅預算案，派糖又縮水，有錢就按北京嘅「規劃」掟去搞大灣區同創科，市民唔滿意之餘，立法會議員梗唔收貨，陳茂波噚日去立會為預算案解畫，俾民主、建制議員係咁捽就預咗，所以佢一直冇同議員硬碰，但八方估唔到波波竟然比新同盟范國威兩隻字辣到着晒燈，之後反擊完范國威再打埋毛孟靜，咁呢兩隻字係乜？咪就係波波最怕人提嘅「劏房」囉！

鬥完大聲鬥溫柔

話說范國威發言大鬧預算案提出用公帑買商場舖位，比社福機構提供服務建議，范國威質疑咁做係利益輸送，容乜易幫地產商買晒啲死場同劏舖場？原本都冇乜嘢，但范國威講到劏舖場，加多句鬧波波當年都係因劏房而「聲名鵲起」。

對波波嚟講，真係鬧還鬧但唔好提「劏房」，一聽到梗係着晒燈！佢劈頭就話范國威聲大唔代表有道理，仲話范國威嘅說話係顛倒是非，混淆視聽，之後議會陣線毛孟靜發言時，就為范國威還擊，話波波講嘢係就係溫柔燙貼、細細聲講嘢，但講嘅嘢一樣係可以顛倒黑白，之後就插波波進貢公帑去搞大灣區同創科，但對市民福利、扶貧開支就大縮水。今次毛姨辣到北京，仲要為范國威出頭，波波即時開毛姨拖，話毛姨剛才演繹係欺文陰聲細氣咁顛倒是非，堅持政府大搞創科只係順應潮流喎！

李八方