近年冒起得好快嘅股評人、光大新鴻基財富管理策略師溫傑（Kenny），幾個月前因為爆出桃色風波，收埋咗自己好一段日，噚日Kenny終於復出，容光煥發咁分享下半年嘅投資展望。

無見一排，Kenny身形弗咗唔少，驟眼睇足足瘦咗成個圈。Kenny話上年身體檢查肥佬，中晒「三高」，醫生話一係食藥、一係減磅，所以佢就決定去做運動減磅，仲好自豪咁話自己用咗5個幾月時間瘦咗成40磅，成個人健康返晒。

咁究竟係咩運動咁有效呢？原來係靠打泰拳，前排仲特登去咗泰國操添。Kenny話自己有少少朝聖心態，放假去旅行時順便練習一、兩堂，仲叫華華可以考慮吓打拳減肥。

Kenny幾個月前桃色風波成為財金界熱話，華華問佢去泰國係咪趁機去散吓心，佢就堅稱純粹為健康著想，無特別散心。再問佢處理好感情事未，佢就笑笑口，講咗幾次冇咩特別，宜家會出返嚟繼續評下大市喎。

李華華