個市昨日好靜，埋單計數只得372.3億元成交，不過，上個禮拜五恒指整支大陰燭急挫，昨天成交縮其實係好事，恒指有11點升幅，「大陰燭」之後整番個「矮陀螺」，跌勢應該暫告一個段落，係反彈嘅時候嘞。之不過上面嘅阻力唔輕，短期內要升番上19000樓上並唔容易，睇嚟都係要整固吓先至會破關。
外圍方面，日股雖然下跌，但係幅度細，反彈應該未完。國際期油升到阻力位，淡友好快會出擊，而啲美元弱勢未變，最多會出現小幅度嘅技術反彈，不過，油價回落已經足以支持美股反彈，對港股呢兩日有利，恒指今明兩日反彈試10日線嘅機會幾大。
踏入呢個禮拜，大市嘅玩法又唔同，兩隻國內重磅股加入咗恒指，連同其他國內嘅恒指成份股，大戶要舞動個市，就唔可以淨係睇住滙控（005）同中移動（941），出年2月工行（1398）隨時入埋恒指成份股行列，就更加係咁。好似昨日咁，啲淡友係咁質滙控同中移動，個市都企得住，大家就知道發生乜嘢事。

招行C輪9059：昨日個市咁靜，成交增加，炒賣活躍，走勢又靚嘅股票少之又少，大隻股份就更難搵到，不過，有一隻股民愛股就出現一幅咁宏偉嘅圖畫，招行（3968）昨收15.30元，升3.1%，突破10日線，成交顯著增加，上個月嘅雄風一時無倆，今次炒上，應該好快上試16.50元，破位睇18元，招行炒上仲會帶起國內銀行股嘅炒賣氣氛。C輪9059昨收2.63元，槓桿率5.8倍（有效5.4倍），對沖值0.93，正股升上16.50元，9059會喺3.70元樓上，正股升上18元，隻C輪應該唔會平過5元，現價買，正股跌穿14.60元止蝕。
俊樺