韓國天團BIGBANG嘅29歲成員T.O.P今個月頭被爆喺寓所吸食大麻，今日T.O.P就現身法院接受審訊，而當日被喺寓所吸食大麻就被爆同場仲有一名女練習生韓瑞希，韓瑞希仲好快被網民起底，被指同《Running Man》嘅宋智孝有好幾分似，而且曾於2012年至2013年參加選秀節目《偉大的誕生》，仲差啲成為女團gugudan嘅一份子，最終佢就於前年簽約另一事務所，成為練習生。

有網民仲翻查佢昔日網上嘅留言，當中有一句係：「跟你哋嘅哥哥們攬攬錫錫好多次。」令唔少網民都猜測佢所指會唔會係BIGBANG嘅其他成員？

而韓瑞希因為吸食大麻，已於本月16號喺首爾地方法院接受一審判決，最終韓瑞希被判處3年有期徒刑，緩刑4年執行，同時要接受120小時嘅藥物治療，並罰款87萬韓圜(約6,000港元)。法院方面指因為韓瑞希對事件進行反省，同時考慮到韓瑞希嘅年紀，所以最終判以緩期執行嘅判決。

不過上周三韓媒就報道檢方因不滿韓瑞希喺一審中嘅判決太輕，已於上周二向法院提出上訴，如法院受理案件將進行二審。