為解決住屋問題，消息透露，特首林鄭月娥擬將9幅私人住宅用地改建公營房屋，估計涉及約1萬個單位。社會一直有不少聲音要求將私樓地，轉作公營房屋發展，而為未來覓地建屋的土地供應專責小組正進行公眾諮詢。影子長策會成員陳紹銘稱，本港土地供應不足，「依家有冇地？係有嘅，只係過往一直分配偏向私樓，依家有嘅地攞咗來起私樓」，若政府將私樓地轉作公營房屋，他指方向正確，「但做得慢，唔知將來仲有幾多地攞出嚟」，認為應加快速度，以及興建公屋及居屋為主，解決基層住屋問題。

陳紹銘續稱，土地供應專責小組工作名義上是覓地，但某程度有其政治任務，「有一半係政治任務、公關手段……唔會完全否定土地小組角色，但某程度小組有政治任務，推公私合營，其實要做用土收一早可以做啦」。但他也認同，可透過土地小組的諮詢及討論，釋放具潛力的房屋用地，「如果民間意見想發展粉嶺高爾夫球場，收返嚟起屋都好」。