琦琦、馬詩慧(Janet)、倪晨曦(Elva)、連詩雅同鄭融等，今日喺銅鑼灣出席護膚品牌Lancome活動，琦琦同Janet相識20多年，琦琦話佢哋由做模特兒初入行嘅時候開始成為好朋友，當中有好多開心嘅回憶，琦琦話：「有一年去泰國度假，我老公買咗部潛水相機，佢就同Michael(王敏德)搬晒啲傢俬落泳池度，當時我唔識潛水，Janet就係咁拉我落水㩒住我影相。」佢哋仲話有好多笑料，仲諗過搞個talk show，但琦琦就怕自己嘅廣東話講得唔夠好，話希望可以雙語廣播，佢哋仲話到時會爆料，冇所不談咁話，兩個身形保持咁好，問到會唔會邊着比堅尼邊做talk show？佢哋都笑住話冇問題，但咁做可能會有啲怪，Janet笑話：「琦琦有啲咩我都睇過晒。」

另外，Elva透露啱啱喺歐洲返港，之前佢就罕有晒同男友嘅合照，問到係咪好事近？Elva話：「唔係，我哋拍拖都有3年，佢係圈外人，都想得到大家祝福，不過依家仲未有結婚計劃，拍住拖先。」佢仲大讚男友有上進心，應該會努力儲錢結婚，佢仲話已經見過家長，屋企人對佢印象都好好。

精選娛聞，喺晒《娛果》
http://fb.com/appledailyent