外媒日前引述長和系內部消息，指主席李嘉誠計劃在明年7月29日、即90歲前退休。正當市場認定有人在「試水溫」之際，誠哥的紅顏知己周凱旋，數小時後突然發文為誠哥解畫，說有人「亂報道」，又話誠哥感莫名其妙，孰真孰假time will tell。但正所謂，最鋒利既刀都有生銹既一日，大家準備呢一日都準備左成5年，與其諗誠哥幾時退，不如先了解下接班人李澤鉅係一個點既人。

街外對李澤鉅的評價，最主要是「數口精」、「計到盡」。兩年前他主理長建（1038）併電能（006），已盡顯其「只有1蚊係枱面、應賺既我都要賺盡你」的作風。佢又喜用「Poker Face」形容自己，堅持大家係「估佢唔到」既。他近年另一金句，是去年中期業績時，曾向分析員表示「除長江中心、和記大廈之外咩都可以賣」，仲補多飛形容自己是「No ego，No emotion.（不會意氣或感情用事）」，和李嘉誠下下強調自己愛香港愛祖國，好大對比。

海迪一名二線地產商高層朋友，說他曾在陽明山莊的百佳遇上李澤鉅，只見他當時孤身一人站在走道望著貨架一段時間，而盡頭有數名保鑣「把守」。另一位朋友則曾因工作原因，須於一公開活動與李澤鉅同枱午宴，但事前竟被對方要求提交CV，大感莫名其妙。或者李澤鉅是一位工作能力很高的人，符合守業者穩穩陣陣的條件，即使李嘉誠退休，短期在無敵的股份回購下，長和系根本不會見絲毫動搖。但視野、人脈長遠就會見真章，海迪相信箇中的分別，將會大過Steve Jobs和Tim Cook。

海迪

掌握財經生活資訊，即Like「蘋果ATM」fb專頁啦！
http://fb.com/appledailyatm