市況差，搞到新股上市活動幾乎絕迹，不過近排仍然有一兩隻新股唔怕冇人吼照招股。新股翻生，最高興除咗係啲i-banker，仲有一眾財經公關。講開招股活動，華華就諗起所謂嘅財圈老鼠。
話說新股招股，例必會搞上市前推介會，等啲上市公司管理層可以接觸吓啲基金經理，推銷吓自己嘅公司。搵得芬佬嚟捧場，點可以失禮，喺大酒店搞個午宴食吓魚翅、鮑魚唔少得，而呢個正係金融老鼠最活躍嘅時候。
財經公關都想搵大行出席，雖然好多都係byinvitation，但推介會嘅資料流出去一啲都唔出奇，有啲豆膶咁細嘅基金公司收到料，不請自來。如果佢哋真係嚟捧場又冇所謂，最麻煩係佢哋當嚟食晏兼聯誼。
據講呢啲金融老鼠唔少都有互相聯繫，而且幾猖狂，自己友覇埋一圍嚟坐。你知五六星酒店一圍酒席分分鐘五六千蚊，啲公關朋友都唔知點向個客交代，但為咗唔想搞大件事，好多公關都息事寧人。