吳若希(Jinny)、胡鴻鈞(Hubert)、吳嘉熙(Cheronna)同唐嘉麟，噚晚去到屯門v city出席「DSE放榜打氣派對」，為今日放榜考生打氣。

胡鴻鈞同吳若希一齊接受訪問，吳若希話自己成績一向唔係太好，考試都係第尾，同埋有一段時間入咗醫院，放棄咗學業，最終喺一個同讀書無關嘅行業發展，佢話：「對讀書因為冇信心，冇得到屋企人嘅支持，讀書唔係最重要，但要搵到目標去發揮。」

日前有讀者向《蘋果》爆料指Jinny喺街向老公發脾氣(新聞連結： https://bit.ly/2maDztE )，Jinny解釋話：「自己唔係好躁，呢啲係生活嘅鎖事，結咗婚總會有啲事情發生，咁啱表現個表情，語氣唔係惡，當時唔係唔開心，亦唔係冇心機抱BB，唔係抱一時三刻，一抱就一個鐘，所以我搵個最舒服嘅姿勢去抱。」

胡鴻鈞話自己讀書成績一般，自己專注學業以外嘅興趣，Hubert話：「去考學校嘅分數仲有一段距離，最終200人面試考20個位，自己獲選之後，都好珍惜學習機會。」

Cheronna話自己讀書一啲都唔好，去到大學階段先至搵到自己鍾意嘅科目，係有關籌辦活動及公關，Cheronna話：「如果唔呢行，會考慮做PR，人生總會有出路，成績唔好都唔需要擔心，讀書唔係人生嘅全部。」

精選娛聞，喺晒《娛果》
http://fb.com/appledailyent