華倉呢日繼續有好表現,頭三場之中,已經有徐雨石同容天鵬各建一功,第四場輪到姚本輝數糊,搵徒弟呂卓賢減七磅騎「永神駒」,結果一放到底,此駒成為姚廐繼「魅影蹄飛」後,今季另一匹三捷馬。
到第五場三T頭關四班1600米,華倉表現更勁,98倍全場至冷呂健威馬房的「芙蓉之威」夥拍黎海榮突如其來,後上一攻而破爆大冷開齋,跑第二名「齊飛」雖然閘前落飛着綠燈,但都有63倍,呢條華倉連贏位冷到賠率板顯示唔晒,唔止999倍,實際買10蚊贏近$14,000,三重彩搭次熱門「君悅灣」都逾22萬,頭關已經冷到飛起,搞到賽前三T6,100萬巨額彩金,未跑次關已經斷得七七八八。
其實呢場如果唔係「齊飛」拉士嚴重塞車,鹿死誰手尚未可料,「齊飛」騎師賴維銘惟有嘆自己唔好彩,加埋第四場他騎另一大冷門「心中有程」又係做阿二,停賽復出後,仲係維持贏過一W咁大把。