現年30歲嘅日本女星渡邊杏今年5月為老公東出昌大誕下一對孖女後，今日終於現身公開場合，係渡邊杏產後首次露面。杏接拍人氣劇《謝謝款待》時跟男拍檔東出昌大發展成情侶，上年有情人終成眷屬，今年仲爆出懷孖胎喜訊。

杏一對孖女早產數星期，兩個囡囡出世後一度要放在氧氣箱留院觀察，數月來杏悉心湊女，孖女嘅體重與健康都逐漸理想。杏產前接拍嘅主演新片《交響樂老人》安排11月上映，今日佢同片中拍檔黑島結菜、坂口健太郎、笹野高史、小松政夫、石倉三郎、藤田弓子等現身記者會，杏都係一如以往嘅苗條身形，更展示招牌笑容，由於今日正係當地敬老日，所以杏即場為68歲拍檔笹野高史按摩肩膊，笹野笑言杏要日日抱女練力，按摩起來自然加大力度。