容顏憔悴的林女士向到訪記者歎謂:「呢間屋計埋廚房、廁所,都只得百幾呎大,細到冇辦法間開廳同房,擺兩張碌架床、雜物櫃同摺枱之後,已經冇乜位,所以細女成日要坐喺床彎低身用個枕頭墊住嚟做功課,辛苦啲都冇辦法。」
林女士的長女早前畢業後,未能繼續升學,又一直難覓工作,成為時下數以萬計雙失青年的一分子;幼女阿欣剛升讀中三,學業成績一向彪炳。
全家靠綜援金餬口
「阿欣由細到大都好生性、好勤力讀書,攞唔少學業成績優異獎,前排喺中二升班試更加考到全級第一名,令我覺得好安慰。但個儍女見屋企環境唔好,就同我講想讀完中三之後暫時停學,唔使我負擔咁重之餘,佢又可以去打工幫補家計。我惟有叫佢最緊要讀好書,唔好擔心其他嘢。」林女士苦着臉說。
五十歲的林女士,丈夫早年患上精神病及糖尿病,無法繼續從事護衞工作,令家庭生活陷困。林女士原從事酒樓女工,近年她證實患鼻咽癌,經過兩次電療手術後,聲帶及說話能力大受影響,難以繼續工作,舉家靠綜援金勉強餬口。
「個病令我講嘢好辛苦、把聲變得好沙啞,經常要飲水,一日兩餐都要用水送飯。」林女士目前須定期到醫院覆診及定時服藥,以控制病情。