立法會地產及建造界別議員石禮謙噚日嫁女，結果要喺灣仔同金鐘之間跑來跑去，原來噚日雖然唔係吉日，但唔知點解好多人擺酒。石禮謙訂咗灣仔君悅酒店舉行婚禮酒會，但因為君悅太爆棚，之後嘅宴席就訂唔到君悅，酒會完咗要移師金鐘港麗酒店擺酒。
雖然石禮謙要騰來騰去，但佢依然好開心，話送畀女兒石凱忻最大嘅禮物，就係來自羅馬教廷嘅祝福，原來呢位慈父為身為天主教徒嘅女兒同女婿，向梵蒂岡申請一紙祝福證書送畀佢哋。
噚晚到賀嘅嘉賓包括梁愛詩、李國寶、劉慧卿等，聽講特首都有到金鐘港麗。石禮謙同八方講，女婿係潮州人，又係大狀，本來同個女係同學，女兒𠵱家已經唔做律師，轉咗去世界兒童基金會做。
（圖）石禮謙女兒石凱忻噚日大喜日子，特別明豔照人。



傳真︰2623-9278
電郵︰[email protected]