聖誕新年期間，無數市民到尖東睇燈飾。今年嘅尖東，比較從簡，皆因九一一之後，好多大廈業主集團，立即咳畢直，連尖東香格里拉酒店佔據咁有利嘅位置，都意興闌珊，聽聞曾經一度想話乜都慳番，後來覺得都係要點綴吓嘅，結果做一啲簡單嘅聖誕樹圖案。據行內人講，九一一令燈飾裝置行業少咗成幾百萬元生意，真係多得拉登一派唔少。
惡佬明一家幾口，趁假期到尖東睇夜景，聽聞新世界大廈停車場有兩小時免費泊車，自不然冇執輸。好嘞，行到十點幾睇完燈飾，一家人隨着人群向番尖西推進，好多人想喺梳士巴利道油站附近過馬路到新世界停車場攞車，但原來隧道封咗，天橋拆咗，行人線過馬路亦因九鐵自紅磡延長至文化中心而取消咗，唯一到新世界大廈嘅方法就係行到半島酒店彌敦道口嘅隧道進口，落隧道行過去，有排行噃。惡佬明話當時聚集咗啲人群，開始鼓噪，卒之有十幾個印度人走出馬路，啲雙層巴士急停，後面啲人，包括惡佬明抱住個仔，一湧而出，數十人一齊衝過馬路，巴士猛咁響「按」，蔚為奇觀！
惡佬明攞番架車之時，諗番過路情景，頗為危險，捏一把汗。後來佢對左丁山講：「九鐵工程起碼重有三年，封殺咗新世界商場，唔怪得停車有兩小時免費！」呢個商場怕者會苦盡甘來嘅，待九鐵支線起好之後，大把人流自火車站行入商場啦！