唔少球星喺場外都係潮人一名，如果要數目前最潮嘅一件Tee，可能係中超上海上港中場奧斯卡杜斯山度士呢件！話說呢位巴西中場喺上周聯賽對廣州富力踢成1:1平手場波，喺中場附近攞波後兩次省落對手身上，結果俾中國足協指佢「以非道德方式侵犯他人」重罰停賽8場，刑期比同場另外3位涉事球員仲要重。

上港隊友侯克喺事發兩日後上載陣中4大外援合照，當時奧斯卡身上一件「NOTHING TO DO, NOTHING TO SAY」嘅T裇已經惹來唔少關注，到咗周日上港主場大勝河南建業4:1嘅聯賽，由主隊球迷到隊友侯克、武磊等都着上同款T裇聲援奧斯卡，喺8分鐘高呼「奧斯卡」名字嘅粉絲們仲用埋呢句口號整咗張大banner，批評足協處罰不公！點解呢件Tee咁火？皆因淘寶等網上商店點會放過呢個賺錢機會，59蚊人仔包郵之餘，仲有親子裝、情侶裝任揀，買番件都抵玩架。