第十九屆香港電影評論學會大獎頒獎禮早前公佈咗得獎結果，今日喺西灣河電影資料館舉行頒獎禮，最佳男主角係《DIVA華麗之後》嘅杜汶澤、最佳電影係《車手》、最佳導演就有兩位，分別係《車手》嘅鄭保瑞同埋《逆戰》嘅林超賢，最佳編劇係《高海拔之戀II》嘅韋家輝、游乃海、陳偉斌、歐文傑，但係最佳女演員就從缺，評論學會會長陳志華話評委討論過程出現分歧，過半數投今屆從缺，佢哋會再檢討個機制係咪太易從缺。

杜汶澤第一次喺香港獲電影獎項，佢話原本諗住戲中其他演員攞奬，點知自己無心插柳攞到，希望繼續插落去。佢又鼓勵新導演，唔使驚大人、老人家監製話你百厭，話你百厭即係話你掂。阿澤亦力撐江若琳喺《高舉‧愛》演技，話佢係今屆金像獎大熱至真。