職工盟噚日選會長同秘書長，李卓人就好順利連任秘書長，但佢大佬劉千石就俾人挑戰。心理衞生職員會、同運輸及物流業職工會就唔滿意石哥政改態度模糊，噚日擺明要拖石哥落馬。雖然石哥都成功以四十票支持、十一票反對、十三票棄權連任，但反對票已經創咗新高，堂堂工運大佬、今日竟然俾咁多屬會挑戰，質疑佢嘅民主同工運立場，都真係令人欷歔。
投票結果都未宣布，石哥就急急腳去主持新辦事處開幕禮。石哥嘅陣勢一啲都唔輸畀曾鈺成，雖然煲呔冇去捧石哥場，但就有仁龍仔嘅第一次。仁龍仔話，今次係佢第一次參加呢啲活動，佢就係要效法石哥，做多啲服務社會啦，𠱁到石哥都唔知幾開心，唔記得晒之先係職工盟俾屬會狂片。

話要「愛你的鄰舍」

𠵱家啲官好驚俾人話大細超，所以邊個議員一請，個個都要去，參加嘅官仲有唐唐、李國章、王永平、肥平、林D9、冬冬同曾俊華，其他高官仲有飯焦、林鄭、陳甘美華、張建宗同王倩儀。特別係石哥，過去一兩年「忍辱負重」，寧被盟友選民質疑佢轉軚都要支持政府，如果啲官咁都唔畀面，日後就冇人支持政府啦！除咗民建聯外，各黨代表都有參加，當然唔少得一度要同石哥私奔斷背組黨嘅工聯會鄺大狀。
自從陳主教升樞機後，社會都多咗人講聖經，前日就係仁龍仔，石哥就將馬太福音嘅「愛你的鄰舍」五隻雞乸大字、寫喺後面塊版度。唐唐話，識咗石哥好長時間，當時石哥幫工人向工商界爭取長期服務金，大家角色雖然好唔同，但都係為社會做嘢，石哥話要愛你嘅鄰舍，政府有錢都會惠及社會，但大家唔好淨係靠政府。
石哥就同八方講，請咁多官嚟係因為好多勞工問題係同唔同部門有關，煲呔唔嚟唔係因為偏心曾鈺成，而係佢冇請煲呔，人哋冇理由不請自來，佢俾人投票反對好正常，冇理由要人哋全部支持佢，只係啲屬會提名佢繼續做會長，佢先至出嚟繼續選啫！
難得咁多高官畀面，即使俾屬會狂插，石哥都心甘命抵啦！

傳真︰2623-9278
電郵︰[email protected]