【新增影片】
身為前鋒成季入得1球，英超「升班馬」哈特斯菲爾德第一簽伏味濃？哈軍周五宣佈，以破隊史轉會費由葡超波圖簽入28歲比利時射手迪普特列（Laurent Depoitre），雙方簽約兩年至2019年夏天，哈軍有權自動將合約延續多一年，確實轉會費就未有透露。不過，話就話迪普特列早兩、三季喺比甲真特大放異采，領軍成為國內雙料王者，為國家隊處子上陣亦即刻有波入，但佢去季以500萬鎊轉投波圖後未受重用，全季上陣12場入得1球咁大把，靠唔靠得住架？

領隊華拿就對迪普特列充滿信心：「佢有數糊能力，場上表現亦努力不懈，同球會嘅精神不謀而合。我哋好高興簽到一位咁具質素嘅球員，目前會專注令佢回復兩季前嘅高水準演出。」另外，英國傳媒廣泛報道，哈軍亦會以1,000萬鎊（約1億港元）簽入去季由曼城外借嘅升班功臣阿倫穆爾，只係有待呢位26歲澳洲中場完成洲際國家盃後落實。