維拉日前簽咗原本係網球手嘅M保定番嚟，表面睇好似要冒大風險，但其實就做一單聰明嘅交易。
唔知球迷重記唔記得科倫呢？之唔係世界盃幫烏拉圭射入一球世界波嗰位前鋒囉。佢未踢波之前，都好似M保定咁打網球，而佢上屆喺曼聯踢咗大半季，一球都未入過，重要俾人話佢陀衰家，累曼聯一個冠軍都攞唔到。最慘就係科倫嘅身價都唔平，足足花咗曼聯成七百五十萬鎊（約八千八百五十萬港元），重簽咗四年半，如果佢再係咁，睇怕曼聯做硬蝕本生意。
維拉今次簽M保定，或者有人覺得佢哋好儍仔。不過，泰萊見到曼聯撞咗板，梗係醒目啦！佢哋只係同M保定簽一年約，另外就係因為M保定同甘士比約滿，所以佢哋連轉會費都慳番。咁樣睇嚟，泰萊似乎比費格遜精明得多。

曲波改定英文名登陸英超聯
國內傳媒話曲波下季有機會登陸英超聯，重話熱刺同愛華頓爭緊佢。老實講，英國佬對體能要求好高；重有佢哋個勞工部亦好麻煩，要為國家隊踢咗四分三比賽，先會發工作證；所以曲波要去英格蘭搵食，其實真係唔容易。雖然係咁，佢為咗方便啲，改咗個英文名叫奇雲（Kevin），由此可見佢真係好有誠意去英格蘭效力。