【韓流】年初與劉亦菲分手 41歲宋承憲坦言恨結婚
宋承憲人生酒館Player
韓國男星宋承憲孖女團f(x)23歲成員Krystal合作嘅OCN新劇《Player》,係國內首齣可以以4DX形式播映嘅電視劇,所以劇組喺首播前,噚晚於首爾永登浦CGV戲院舉行4DX試映,畀劇迷先睹為快,宋承憲、Krystal、李施彥、太元碩四位主演亦有現身與劇迷見面,宋承憲更大方送抱冧粉絲。
而宋承憲及Krystal等人日前亦擔任tvN綜藝節目《人生酒館》嘅嘉賓,為新劇宣傳。《人生酒館》喺噚晚播出,主持人之一嘅申東燁與宋承憲份屬好友,申東燁大爆宋承憲初出道拍韓劇《三男三女》時曾NG 90次,宋承憲就坦言:「《三男三女》係首齣作品,之前都未拍過戲,只係做模特兒時面對過鏡頭,所以覺得好辛苦。當時申東燁幫咗我好多,我覺得佢係我嘅恩人。」公開感謝好友。
今年初與大陸女星劉亦菲分手嘅宋承憲,喺節目上亦提到自己嘅愛情觀。宋承憲稱如果真係愛上對方,就會不顧一切咁相愛,佢又指過去曾因為自己嘅猶豫,錯過同對方發展嘅機會,所以之後拍拖都會主動出擊。現年41歲嘅宋承憲依然單身,對於結婚一事,佢坦言見到幸福嘅情侶時都覺得好羨慕、好想快啲結婚,但同時亦感到苦惱:「因為婚後嘅生活就好似完全唔同咁,例如你想約朋友見面,就會因為要照顧小朋友而變得好難。」
精選韓流,喺晒《娛果》
http://fb.com/appledailyent
宋承憲孖拍檔Krystal亮相《人生酒館》宣傳新劇