【搭上邊個尊尼偶像?】43歲宮澤里惠帶男星返香閨過夜斷正
V6森田剛宮澤里惠
43歲日本影后宮澤里惠私人活立立亂,同佢扯上過關係嘅異性真係兩對手都未必數得晒。宮澤里惠於09年奉子成婚嫁圈外人,其間都惹上多宗緋聞,今年初佢正式同老公結束近7年嘅掛名夫妻關係。
日本雜誌《週刊新潮》預告聽日出版嘅新一期,會公開宮澤里惠秘密搭上一名比佢年輕嘅尊尼事務所男星,更直擊兩人於今個月22日深夜到澀谷區代官山TSUTAYA拍拖,當晚二人於Cafe撐枱腳,里惠被拍得甜蜜地手翹對方,之後更到其香閨過夜,呢位男星約10個鐘後離開里惠寓所。目前《週刊新潮》未有公開男方身份,只上載一張過夜後上的士嘅半身照片,唔少人都於網上揣測里惠新歡係邊個尊尼偶像,錦戶亮、手越祐也等都榜上有名,不過嫌疑最大就係V6成員森田剛,事關佢同里惠曾合作舞台劇,加上噚日已有網民於Twitter留言話目擊37歲嘅森田剛同疑似里惠嘅女子現身代官山TSUTAYA,相信聽日揭盅定成頭條新聞。
另外,里惠上昨晚播出節目接受笑福亭鶴瓶訪問,佢自爆曾被肯雅一名狩獵族首領求婚,開出送50隻牛嘅條件望娶里惠做第5個老婆。