上季替車路士射入20個聯賽入球嘅迪亞高哥斯達（DC），早前自爆收到領隊干地嘅訊息，話主帥已通知佢下季冇得留低，而英媒亦傳話兩人關係已決裂，干地已準備好搵盧卡古回巢代DC個位，如果真係如傳聞中所講，咁筆者會幾擔心下季車仔衛冕嘅機會。

單以上季入球數字，盧卡古確實靚，踢愛華頓都有25個聯賽入球，唔係後尾哈利卡尼復出發威，英超金靴應該會係佢攞走。不過，筆者亦好記得盧卡古代表比利時踢歐國盃決賽周嘅表現，試過離門數碼幾次唔入，某程度上，佢嘅埋門把握能力，仍然值得商榷。

之前有英國嗰邊球評家，探討過盧卡古4月對曼聯一戰一些技術層面嘅分析，發現呢位中鋒一些盤球或傳球的選擇上，都感覺欠缺一點火喉，加上獨食緣故，有時白白浪費了愛華頓少有打反擊嘅機會；再綜合睇盧卡古今季嘅入球分佈，大部分都係對中下游球隊所入，在Big 6身上只入得四球，似乎喺對勁旅時，要靠佢數胡唔係太可靠。

前利物浦後衛尼高，最近受訪就睇死盧卡古代唔到DC，個理據係呢位比利時中鋒要喺足夠空間先可以發揮到佢嘅爆發力，同埋佢做唔到好似DC咁，可以同夏薩特或其他隊友做快速one-two，所以車仔引入佢之後，可能要喺戰術上做相對嘅調整。

當然你可以話，佢踢緊嘅係愛華頓仲想點，而且世事無絕對，亦不敢斷定佢之後嘅發展，只不過當日僅售2,800萬鎊畀愛華頓，家下要用大約6,000或7,000萬鎊先回購到，車仔真係好似水魚咁畀人搵笨。不過，曼聯上季回購保羅普巴都係咁：免費走，8,900萬鎊買番，家下轉會市場冇話咩值唔值，只有啱唔啱用。

話時話，總覺得車仔有時好後知後覺，眼光比較短淺，唔肯畀多啲機會後生仔，好似當年放走咗奇雲迪布尼、穆罕默德沙拿、賴恩貝特蘭等，都係離開後發光發熱，只不過既然走咗，就唔好今日先嚟後悔，傻到要用咁多錢買番盧卡古。今夏，佢哋又再犯同一個錯誤，冇好好留住蘇蘭基，拱手相讓利物浦，唔知睇完世青盃後，會唔會又再後悔呢？