被喻為香港預言書嘅電影《十年》贏咗香港電影金像獎「最佳影片」之後，《十年》嘅影響力繼續發酵。《十年》國際版亦已經成行，《十年台灣》、《十年泰國》同《十年日本》亦開始。

喺今日韓國釜山電影節，《十年》監製蔡廉明舉行記者會，會上宣佈曾經執導過《誰調換了我的父親》、《海街女孩日記》和《比海還深》嘅日本導演是枝裕和會擔任《十年日本》嘅監製。

蔡廉明今日接受電話訪問時話今次拍《本地蛋》伍嘉良會歸隊，佢話：「伍嘉良係成個《十年國際》嘅監製啦。可以搵到是枝裕和合作好開心，日本唔係咁政治化，但係會講社會議題，有關環保、老年人、科技，佢哋關注嘅議題。想像返日本10年後會係點。」

另外，仲有《十年台灣》嘅題材會聚焦喺環境同文化災難、原住民被天災逼進死胡同，隨着文化嘅失落，出生率下降，虛擬實境大行其道，使現實與虛幻更難分辨，電影都會講到民工被剝削嘅困境。《十年泰國》會探索強權政府下嘅泰國將會何去何從，五位導演當中嘅Apichatpong Weerasethakul，係唯一一位泰國導演贏過康城影展金棕櫚獎。電影會想像將來泰國係個分裂國家，人性同創意喺政權嘅監管下，日漸熄滅。