阿根廷近兩輪世界盃外圍賽只得一分，球迷當然唔收貨，更掀起一股倒教練比爾沙嘅浪潮。近日有阿根廷球迷整咗個網站，希望趕比爾沙落台。另外，連以前明撐佢嘅阿根廷足總都話，只要比爾沙肯落台就隨時易帥。搞到咁，怕且比爾沙都無癮啩。
據報指，截至星期二已經有成五千個球迷Click入過呢個反比爾沙嘅網站www.echalo.com.ar ，支持比爾沙劈炮；而三十二歲網主講明唔想再畀比爾沙「將歐洲足球風格注入國家隊，要光復阿根廷傳統足球風格喎。」
對比爾沙嚟講，最傷心莫過於足總主席格當拿都話，如果比爾沙肯辭職，就即刻委任小保加教練比安基。連人選都有埋，比爾沙冇碇企囉。

走定唔走？拉素要文仙尼表態
有關拉素教練文仙尼將會過檔國際米蘭嘅消息，連意大利傳媒都寫到悶晒，但一直只聞樓梯響。拉素總監迪米達終於忍唔住，要求文仙尼盡早表態肯唔肯留任。又係嘅，祖雲達斯、AC米蘭已火速組軍，而拉素連教練係邊個都未知，到下個月初就大圍開操，唔通到時至搵新教練？