巨鑽恒久遠，鄭家永流傳？話說周大福（1929）2010年一擲2.75億元，投得507.55卡嘅南非鑽石毛坯「庫里南遺產」，經切割鑲嵌嘅巨鑽噚日終於面世，主席鄭家純笑晒咁話，今次好開心，係集團一個里程碑，講到明此乃非賣品嚟，「賣咗出嚟，肯定買唔番。」
純官長子、集團執董鄭志剛（Adrian）向來對藝術有研究，佢形容呢件巨鑽首飾屬於博物館級別嘅藝術品，唔會賣，會係鄭家嘅「家傳之寶」，將來可能會作巡迴展覽。
心水清嘅純官聽見Adrian咁講，就糾正阿仔，指呢件巨鑽首飾唔係私人所有，係屬於周大福嘅「鎮店之寶」。有人多口問純官乜唔係將件首飾傳畀Adrian咩？純官就笑笑口話「佢就想！」

保費逾7億

講番呢件巨鑽首飾，周大福競投呢粒巨鑽毛坯時，已經希望可以切割出一粒100卡嘅鑽石，反覆研究終於做到，一共切成24粒鑽石，最大一粒重104卡。周大福請來著名珠寶設計師陳世英設計整件首飾，作品命名為《裕世鑽芳華》。
現場睇呢件首飾認真夠閃，除咗巨鑽，仲加上好多配襯，包括超過1萬粒白鑽、500粒粉紅鑽、過百件羊脂白玉與翡翠。成條鏈既有粉紅鑽與翡翠嘅色彩，又有白玉嘅溫潤感覺。
純官透露，呢件鎮店之寶，淨係保費最少7.8億至15.6億元。如此貴重，究竟如何保管呢？純官即刻好精靈咁話「當然唔可以講喇，傳咗出去咪好多人嚟，天機不可洩漏。」
不過話時話，噚日北京為抗戰勝利70周年舉行大閱兵，唔少城中富商身在北京，純官兩父子點解在港嘅？純官強調，佢都收到邀請，只係為咗巨鑽而留港。周大福發言人補充，早於中央宣佈閱兵日子，已經定實發佈時間。

李華華
mailto:[email protected]