保險經紀要撈客，唔單止要口才叻，仲要識分身。話說有唔少保險業人士，都會上高登出吓POST，向大眾洗腦…（sorry，講錯，灌輸至岩）灌輸買保險嘅重要性。

上個月底就有位巴打「松楓島蔡才子」出Post話自己老表生Cancer，覺得生命無常想買保障，問其他巴打意見。2分鐘後，就即時有人覆佢話認同要買保險云云。

不過，個重點係，覆佢嗰位巴打竟然都係「松楓島蔡才子」。結果被其他一眾高登仔留名恥笑，「你，未轉ac」嘅回覆排山倒海湧出，真係撳都撳唔住。事後仲有人踢爆呢位「松楓島蔡才子」，每次出Post都係講保險。事件擾攘到今日，呢位「松楓島蔡才子」都未俾人笑完。

所以話，家陣保險生意難做，但要做打手都要小心啲至得架，否則，咪好似「松楓島蔡才子」咁上報囉！