【為師弟打氣】同學情緒受困擾 秋生自認「老鬼」幫手輔導
蘋果日報 2019/09/06 16:21
黃秋生攬炒白色恐怖演藝學院
攝影：沈健程
黃秋生今日以師兄身份，返母校演藝學院出席分享會，討論「白色恐怖下何去何從」，有同學問及如何在日常生活與抗爭取得平衡，秋生說：「冇一個社會運動係會即時見效，好多嘢都係一個長久嘅東西，甚至今次可能冇即時迴響，唔緊要，我見到反而唔係成件事會答應你甚麼東西，我見到嘅係香港年輕人嘅醒覺，呢個唔係一時三刻嘅東西，而係好長遠嘅事，有人嘅地方自然有希望，人先係嗰個地方最重要嘅東西，所有嘅嘢都係由人變出嚟，所有嘅文化同繁榮，都係由香港人建立出嚟，只要有一個人，香港就有希望！」
談到有不少示威人士遭到暴力對待，秋生說：「我唔係話反對以暴易暴，係講緊呢個暴去到乜嘢程度，兩軍對陣，就梗係打仗，你去強姦放火仲乜嘢呀？如果咁樣嘅定義，當年日軍南京大屠殺冇錯喎？你都打我，人哋咪劏你啲人，我哋唔係你進我退，係兩方面嘅事，好正常，但係你講到去騷擾人哋屋企，呢個暴力咪過咗火，我係講緊呢樣嘢，就算對方做咗一啲過份殘忍嘅嘢，我哋都唔可以去學佢哋。」接着有學生提到「攬炒」問題，秋生說：「其實一直冇人話搞冧香港，只係政府有呢個諗法，上一代真係有份建設，但係佢哋冇留過畀下一代，自己拎晒啲着數，好似電影圈，梗係有一大班人去攞晒啲着數，但係冇留到畀後面啲人，全部係上面都食到盡、食到爛，之後再留番個爛袋畀人，跟住又話人哋搞爛佢。」他續說：「其實都袋晒錢，都退休喇，爛唔爛其實都唔關你事，唔通你行返出嚟做嘢咩？唔會喇！」
後來，又有學生請教秋生如何對付無賴？他笑說：「個個嘅方法都唔同，我通常係笑佢哋，當佢係小丑咁笑，之後會無視佢，都幾無癮！」其後亦有老師發問問題，他感謝秋生到學校與同學見面，提到有同學在情緒方面受到困擾，秋生說：「所以而家咪要搵啲老鬼出嚟輔導，唔好畀仇恨影響咗眼睛，控制你嗰個係魔鬼，佢會影響你整體生活，社會畀咗年輕人好多壓抑，變咗好多年輕人自殺，市民真係要自救，要自發成立一啲組織，幫啲年輕人去舒緩，幾時將啲嘢擺埋一邊。」
講座在網上進行直播。
秋生今早返母校，與師弟、師妹見面。
秋生離開時沒有接受訪問。