東方表行（398）升到近1年高位，但現水位點計都仲係超抵買，買定等破位。東方表行截至去年9月底止2010年度中期業績，仲係受到金融海嘯影響，純利倒退50%，到3431萬銀。就算集團下半年純利只係維持到上半年水平，全年度純利6862萬銀，預期PE都係11倍，仍然係場內最平。
而受惠消費復蘇及內銷因素，集團2011年度純利，係咁易上番09年度1億銀，預期PE更跌到得番7倍，家陣同類股講緊嘅預期PE全部雙位數。又東方表行最新NAV3.30元，現價折讓40.6%，同類股PB，全部1倍樓上。講折讓，東方表行亦係勁抵買。以2011年預期PE10倍做目標，現價要升44%，到2.83元；以1倍PB做目標，股價見3.30元，即係現價要升68%，先至到位。

有利折讓大博得過

有利集團（406）手頭現金6.64億銀，借貸得2.88億銀，揸住淨現金3.76億銀，相等於每股0.86元，係現價（1.30元）嘅66%，屬現金牛一族。有利最新NAV2.85元，現價折讓54.4%，建築股當中，有利係最便宜選擇之一。若果計埋集團喺觀塘及上環重建項目嘅增值效應，折讓肯定唔止呢個水位。呢轉短打，博升20%，有利股價見1.56元，未有耐上到NAV水位。
錢雋