地監局明日出新執業通告，要代理遵守《競爭條例》，其中不得存在行規收費，即買賣雙邊1%佣金的做法。

在土瓜灣從事地產代理逾廿載的鄭瑞正「正哥」坦言:「就算未有呢個新指引，好多時客人實同你傾佣，做成單生意後，都會減返多少佣金，呢方面好彈性。」

「簡單講，唔俾你地行內夾埋咁做，不過條例係死。例如我地做街坊生意，阿婆阿嬸唔係認你招牌，係認你個人。放盤俾你，你會唔會要佢簽乜乜協議呢？佢唔會架，通常都係話，做成先算啦。」

對於行規收佣1%的情況不再，正哥話:「你見到而家市道，低到好低個隻，成交根本每間代理行分唔到一單成交。每日坐係度捕蛋囉，做生意，睇個天，好彩，一日開兩張都有，唔好彩，幾個月開唔到一張都唔出奇。過去一年生意好差，差過沙士。托賴有班熟客支持。」

會否擔心大行劈佣頂爛市，正哥回應:「無得頂架，各有各做。大行主要做新盤，我地主要做二手。有時新盤方面，我地都會同大行合作，我地駁艇，介紹買家，佣金分拆。」他續稱，「佣金有無得減，好難講，好似阿哥哥仔，你買完，同我講，佣金收順少少得唔得呀，我會話，唉無所謂啦。收唔足，無計架，唔通擔到埋口你唔做呀，都要搵食架嘛，最少起碼收一半以上啦！（即0.5%?)係咁上下啦。」

掌握財經生活資訊，即Like「蘋果ATM」fb專頁啦！
http://fb.com/appledailyatm