當年今日
關於我們

【Wanna One亞博騷】搬櫈勁混亂 粉絲向前逼遲足個半鐘未開騷

蘋果日報 2017/10/03 20:27

亞博館Wanna One

【更新內容】
韓國上位新男團Wanna One今、明兩晚喺亞博館舉行粉絲見面會,現場可容納8千人,噚晚11位成員漏夜抵港,並於今日下午率先見傳媒。見面會原定於晚上8時開始,不過因為前排粉絲不停推前啲櫈,希望企前啲見到Wanna One,搞到場面勁混亂,好多觀眾變成冇位坐,現場大會多次開咪呼籲粉絲安坐喺座位上,如果唔係可能會因安全理由而有可能終止活動。而中間及後排嘅觀眾就好乖,坐定定等個騷開始。
到現時8點30分,個騷都仲未開騷。大會司儀森美現身叫粉絲要安坐自己位置,表示要清空消防通道、每個防火通道清空返先可以開騷。
對於仲未開騷,粉絲自然唔開心,當中張小姐就話:「唔開心,好嬲,估今晚9點先可以開騷,覺得安排返喺大館開騷仲好。」
到晚上9時06分,由於目前仲有Block A位置仲未整頓好,所以大會要求該區嘅粉絲出場,之後憑票再重新入場,現時粉絲正離場後再重新入場。大會用廣東話、普通話及韓文分別表示,因為場館基於安全理由,唔俾粉絲企喺度,一定要人人坐定係自己個位,所以現時要請粉絲離開,等大會排返好啲櫈,確保人人坐返好自己個位先開騷。目前Block A某啲區嘅粉絲已離場,大會執返緊啲櫈。
到晚上9時45分,現場終於熄燈,見面會正式開始,即遲足1個小時45分鐘。