尼馬點解要離開巴塞隆拿，轉投巴黎聖日耳門？除咗錢多，以上呢張相應該解釋晒一切。

喺巴塞，有美斯、蘇亞雷斯、甚至恩尼斯達同碧基呢啲自家青訓，尼馬邊有得做最大；不過，去咗一支雜牌軍嘅PSG，情況就唔同晒。由於前一輪法甲，烏拉圭前鋒卡雲尼同佢爭射12碼，搞到場面非場尷尬同唔愉快，之後尼馬unfollow咗對方IG，仲傳話要求高層喺轉會窗重開後，盡快將對方賣走，講明已經合作唔到，更擺明向外宣示：「我就係PSG嘅大佬！」

或者大家唔信尼馬真係有咁嘅權力影響PSG嘅轉會方針，但「新亨利」基利安麥巴比最近喺Twitter放咗張相，就真係唔到你唔信。話說上周末係堤亞高施華生日，成班PSG球員都有出席生日派對，連被貶預備組嘅賓艾化都喺度，惟獨見唔到卡雲尼，似乎大家已經選擇咗企喺邊邊，認定尼馬先係大佬。

PSG家陣巴西幫獨大，只得卡雲尼一個係烏拉圭人，真係拗手瓜，明眼人一睇就知邊個會贏。可憐嘅係卡雲尼由2013年開始嚟到，名氣加資歷喺隊內都叫有啲地位，伊巴謙莫域走後以為坐上「一哥」位置，點知一遇到尼馬，先知原來自己已經失晒寵。