黃心美、羅家英、黃又南、廖啟智今日喺影視娛樂博覽為ViuTV與Toggle合作劇集《已讀不回》宣傳，大會安排心美餵蒙住眼嘅家英哥飲咖啡，之後家英哥好風騷唱咗幾句《熱咖啡》。

喺戲中飾演牧師嘅家英哥話自己好耐冇喺香港拍劇，覺得今次故事好好，只開3日工，仲話：「呢一套劇要好有耐心去睇，平時大家睇開啲唔使點樣諗嘢劇集，呢套有推理，要用腦去追看。」家英哥又話Liza姐(汪明荃)叫佢加價做少啲，唔想佢咁辛苦，今次都有酌量加價。

另外，心美透露今次套劇會去會新加坡、深圳等地取景，去新加坡時會有5日假期，已經諗定叫男朋友同行順便度假，因為一開工就好少時間同男友見面，希望爭取時間拍拖。問到劇中有冇一啲好激情場面？心美話：「冇呀，我同男朋友都接受唔到，不過如果係黃子華同林俊杰就又攬又錫，床上碌嚟碌去都得。」

精選娛聞，喺晒《娛果》
http://fb.com/appledailyent