只要業績靚、增長好過預期，就有資金瘋狂追入，估值貴唔貴都係其次，石藥（1093）、金蝶（268）、藥明（2269）隻隻爆升，一方面繼續喺優質二三線股搵業績炒仲有運行，大可以見業績靚仔先追都仲得。短炒業績嘅話，先睇增長、復蘇幅度，只要唔係嚿年升浪早已price in嘅汽車、資源商品股之類，有持續增長概念嘅績優股繼續炒。另一方面，呢個現象反映投資者心目中港股嘅高度相當高，只要啱心水，幾貴都有人前仆後繼，對整體大市嚟講都係利好訊號。

平保（2318）公佈嚿年純利增42.78%，壽險新業務價值升32.58%，兩者都高過市場預期。新業務價值增幅拍得住友邦（1299）之外，金融科技及醫療科技營運利潤37.71億人民幣，2016年虧損為35.75億，若包括一次性重大項目，賺146.21億人幣超誇張，按年升1.36倍，呢條數已經相當於壽險及健康險業務嘅四成，亦佔整體盈利16%。互聯網金融經常性盈利35億，未來繼續開turbo，其餘財險同內銀業務唔點增長，不再重要。

相比就嚟公佈業績嘅國壽（2628），壽險保險收入遲早畀平保爬過頭，平保之後嘅龍頭品牌效應可以催谷收入，仲有陸金所、平安好醫生咁多殺着，互聯網金融已成為主戰場。國壽相比已明顯落後，兩者越行越遠。

平保每股內含價值45.14人民幣，股價對內含價值1.63倍，市場給予壽險業務嘅估值相信喺內含價值2倍以上，估值唔算好平，但壽險新業務價值加上互聯網金融高增長足以支撐呢個估值有餘。

平保同國壽，就當係一間公司嘅員工去比較，平保就好似一個技術領導潮流、不斷求變、產出不斷增長嘅員工，至於國壽唔係唔勤力，但功藝停留喺10年前、新技能仲未學得掂，即使前者人工double，但投資者似乎都鍾意前者，貴啲都冇所謂。平保亦應該慶幸，有呢個對手畀佢繼續搶佔市場份額、提供增長。

晉佳

https://www.facebook.com/advanceguy1/