韓國女團f(x)成員Amber早前先喺節目上，講過因為自己嘅中性打扮，曾經多次被人質疑佢嘅性取向，噚日Amber喺演出節目《4種秀》時，就自爆亦都曾經因為自己嘅中性打扮，而被人孤立，令佢有諗過自殺。

Amber喺節目上提到自己細個嘅時候，無論去到邊，包括韓國，都會因為打扮同外表而孤立，仲成日聽到人哋話「作為女仔你有必要咁樣？」、「你點解咁奇怪？」等。

Amber又補充話：「我成日都畀人蝦，所以我成日都會自己一個人，好多人會無啦啦對我講粗口、蝦我，或者避開我，我覺得好寂寞，亦都曾經因為覺得冇人理解我要行嘅路，所以有過想自殺嘅念頭。」不過，Amber都話因為自己細個嘅經歷，令佢明白唔可以以貌取人。