諾貝爾物理學獎得主、被譽為「光纖之父」的高錕於去年離世，其夫人高黃美芸亦致力推動學界科技教學，為香港中文大學校友會聯會陳震夏中學的「高錕未來教室」主持開幕禮；個多星期以來反「引渡惡法」修例引發的抗爭有不少大學生參與，八大院校校長至今未有為事件發表意見，問高太若高錕教授仍在位中大校長，可會為學生講説話？「我覺得佢會。佢會回應，有自己意見⋯⋯我係咁覺得。」

高太認為學生年代最輕鬆，可以學到很多事：「不過，（抗爭）未必諗得很清楚，很熱血、熱心，以為係啱⋯⋯佢大啲嗰陣又未必咁諗。呢個時期係學生學嘢，所以，學得啱唔啱，希望係啱！不過，佢哋出嚟發聲，都係學嘢！」是否認同今次學生的抗爭？「應唔應該呢⋯⋯應該係要合法，做得亂就唔應該，不過，（今次）係應該出聲嘅！」對於「6.12」警民衝突，當中有很多學生，她坦言中學生未必全然理解，「大學生又會聰明啲明白多啲，不過我覺得今次兩邊都有做錯嘢，（警方）又唔應該咁打。邊個做錯先？我唔係咁想講。」

高太笑道，高錕擔任中大校長時，因為接受中央委任港事顧問一職，遭學生責罵記憶猶新：「啲學生話炒佢，佢（高錕）覺得無嘢，覺得學生都係學嘢（高教授無譴責過學生？）無，那個時代的學生就係咁，係學嘢，大個就會明白對錯。」她覺得每個人的人生也不住學習，官員亦然：「你見到第一次星期日，差佬係預備打仗嘅，學生知道係預備打佢哋嘅，都係預備打仗；咁下個星期日就學識，大家要攞個心出嚟預備講嘢先得，唔係咁樣打！」

高錕：「從來不罵學生」的大學校長

高錕於1987年至1996期間擔任第三任中大校長，任內既經歷了六四事件，而1993年，他以個人身份接受中國政府委任為港事顧問，因而引發校內學生激烈抗議，在同年中大開放日，他在百萬大道會場發言時遭學生「搶咪」，即場拉起橫額「兩天虛假景象，掩飾中大衰相」調侃他接受北京任命；當時身任學生報記者，現為中文大學政治與行政學系教授周保松即場問他：「校方會不會處分示威的同學？」高錕回答：「處分？我為什麼要處分他們？他們有表達意見的自由。」

據悉，當時學校管理層，和不少校友均認為絕不能縱容學生，須予以懲罰；然而，高錕卻不以為忤，是僅有反對處分學生的其中一人，最後亦沒有任何學生受到懲罰。

記者 羅惠儀 攝 王心義