《2017香港小姐競選》十二位候選佳麗，今日就去到台灣拍攝泳裝外景，同行嘅仲有宣萱同袁文傑，一班佳麗今次係第一次以泳裝示人，睇落去都有少少緊張，唔知係唔係太緊張嘅關係，佳麗們嘅皮膚都唔係太好，如果放大睇的話，可以睇到月球表面。至於邊個嘅身形最完美，一定係7號雷莊兒。

至於2號何依婷同5號梁雯蔚都係細細粒，佢哋兩個都好緊張，問到佢哋影之前有冇節食，何依婷就話只係食咗一半早餐，因為唔想影相嗰時個肚腩凸出嚟，梁雯蔚就認為身形均勻係最重要。

1號張寶欣同12號邱晴一齊受訪，佢哋一個緊張，一個興奮。問佢哋會畀幾多分自己，邱晴就話只係畀自己6分，覺得個肚腩有少少凸，可以再減下，而佢哋都大讚7號雷莊兒嘅身材。

3號金美黎同11號胡美貽，喺訪問嗰時，對着泳衣嘅態度好唔同，一個就好少着泳衣，所以咁樣公開見傳媒就一直震，一個就喺外國着慣三點式去沙灘，覺得好普通。金美黎就唔覺得自己嘅身材突出，會做好自己，而胡美貽謝謝媽媽留畀佢嘅好身材，但作為女孩子始終有負擔，要鍛練多些，希望手臂同大腿要再瘦啲，依家運動量唔夠。此外，佢哋都係一致認同7號雷莊兒有前有後，有肌肉，膚色很健康，很陽光，是最突出嘅一位佳麗。