特區政府堅持今日恢復二讀及三讀《逃犯條例》修訂，引來民間社會更大反彈，各界別紛紛自發罷工、罷市、罷課。不少政界人士說，今次抗爭行動由民間自發，規模之大並非個別政黨可以發動，社會矛盾與撕裂較當年佔領運動有過之而無不及，即使今次港府、建制派夾硬過了送中惡法，市民對北京、港府、建制派的怨氣，只會較當日佔領運動更大，「莫講話林鄭政府管唔到落去，對北京而言，仲會有人信北京？大灣區仲有商界肯同你搞？」

嚇怕外商　「大灣區唔使搞」

多名政界中人感嘆，原本政府要做《逃犯條例》修訂，「可以有其他更好嘅方法做，但林鄭根本唔聽任何反對意見，堅持用最一意孤行、最差嘅方法做」，事件觸發社會矛盾，與當年佔領運動差不多一樣，「搵林鄭做特首，原本係要修補社會撕裂，點知佢就帶頭撕裂社會」，原本林鄭說要搞民生、經濟，連政改也不搞，「點知一個送中例就反轉成個社會，林鄭辦事能力完全見晒底」。

另一專業界人士說，年初北京還說要香港專注經濟，用金融優勢協助中國、搞好大灣區，「送中惡法已嚇怕好多外商，莫講話大灣區唔使搞，恐怕香港國際金融中心地位亦不保，中國以後唔使諗用香港吸外資」，他們不約而同對季陶說：「要夾硬過《逃犯條例》修訂唔難，建制夠票就得，但對香港甚至北京造成損害，怕且好難修補。」

周一、三、五刊出
季陶