哥本哈根聯合國氣候變化大會真係一場「國際秀」！全球咁多國家發展步伐不一，關乎經濟效益之二氧化碳排放上又點會咁易有共識。
雖有「做秀」感覺，但從另一角度，會議讓人思考新能源「上位」空間，不過傳統能源在可見將來仍難取代。現時發展中國家對礦產能源需求若渴，礦產資源股仍會吃香，好似今個月以來港股表現麻麻，但煤炭股相對算硬淨。

呢輪幾隻煤炭股各有消息，其中恒鼎實業（1393）最近斥資近4億元收購雲南煤礦，之後又公佈自集團在07年9月上市以來，已於內地額外收購23個煤礦，家陣共有42個煤礦，而且現有儲量及資源顯示平均開採壽命為50年。此外，內地冷鋒再臨，煤炭供應緊張，刺激煤炭售價上升，上述因素均對恒鼎前景有正面影響。
揀恒鼎，係因為該公司為內地西南部最大的一體化煤炭企業，最近收購雲南煤礦，料將成未來盈利新增動力之一。恒鼎昨日雖曾低見8.54元，但彈力極強，收市倒升1.6%，報9.25元，建議在9元以下買入，中線目標13.80元。
方星俠