生為港英遺民，長於政權易手，立在北水漫灌。呼吸過回歸前自由嘅空氣，食埋「五十年不變」嘅尾水（大概都有十年）。可以話，香港嘅「甜酸苦辣」都試過晒。我呢代香港人對於六四嘅感覺大概都經歷過許多高低起跌。

讀中學嘅時候好熱血，去過支聯會幫手，風雨不改，曾經識唱「那天我中國展步，何時睡獅吼響驚世歌……」。首歌叫做《中國夢》，羅文原唱，黃霑填詞，趙文海作曲。原來我都曾經如此「大中華」，如此「愛國」。相信回歸後土生土長嘅一代無幾個會唱得出口。

去到讀大學，支聯會成員年紀漸長，要開始搵人接班，「薪火相傳」，記得當時有一隻「新歌」好好聽，好好唱，做K歌一流，可惜去唱K係搵唔到的。隻歌叫《民主會戰勝歸來》。然後，就好似沒有然後了。印象中呢首歌就已經係近年六四遊行、集會最後嘅新元素。

之後漸漸覺得維園六四燭光集會太過「左膠」，常委太「錫身」，年復一年「哭腔」行禮如儀。一方面講咗咁多年「平反六四」、「結束一黨專政」，另一方面專權政府如日方中，穩如泰山。加上自己都已經出咗嚟做嘢，消磨了不少意志，滿腔熱血都攤凍咗一半，就算唔係失敗主義，身心俱疲，無力感滿溢。因此最近有一兩年去咗本土派嘅悼念活動，始終中國太大，無力回天。加上喺香港政治打壓日益嚴重，溫水煮蛙多年，開始覺得熱，顧掂自己先。

去到今日，香港人一年內經歷反送中、走資、BNO平權 、警暴同國安法等等。形勢急轉直下，雖然遍體鱗傷，依然人心不死。香港彷彿一下子就返到去1989春夏之交嘅北京。昨日北京，今日香港。

六四燭光集會30年來首次被禁，縱使當晚銅鑼灣秩序良好，市民自覺保持社交距離，連支聯會主席李卓人、《蘋果日報》創辦人黎智英等被新世代視為溫和民主派人士，都在今日被控「煽惑未經批准集會」。六四同香港人從來未試過咁Relevant，無論你係生於乜世代。

【蘋果論壇： https://hk.appledaily.com/feature/onlineforum/，投稿網上論壇可電郵到[email protected]】